به گزارش نصر، بو اثر نغمه ثمینی‌‌نین قلمی ایله یازیلیب، آیدین سرداری‌نیانین قلمی ایله ده تۆرکجه‌یه چئوریله‌رک، یئنی بیر قالیبدا صحنه‌لنمیشدیر. «اوشاق»دا مهرداد نیکجو، نسرین فاتح، سئودا عبدالعظیم‌زاده، نازلی سلیمیان و صدف رحیمی کیمی اوْیونچولار روْل ایفا ائتمکده‌دیرلر.
«اوشاق» کؤچ و کیمسه‌سیزلیک دردی ایله ساواشارکن، اومود و یاشام آختارماقدا اوْلان قادینلارین اینسانی و آجی روایتیدیر. برابرسیزلیک و ایجتیماعی فیشارلار آلتیندا یاشام اوغروندا ساواشان قادینلار، کؤچنلر و اوشاقلارین دغدغه‌لرینی تصویره چکمکده‌دیر.
«اوشاق»ین گؤزه چارپان اؤزللیکلریندن بیریسی تۆرکجه صحنه‌لنمه‌سیدیر؛ تبریز خالقی‌نین فرهنگ و هویتینده کؤک سالمیش اوْلان دیلده. بو اثرین تاماشاچی‌نین آنا دیلینده صحنه‌لنمه‌سی، حیکایه‌نین روایتینی موخاطب اۆچون داها دا صمیمی و تأثیرلی قؽلماقدادیر.
«اوشاق»ی صیرف بیر تئاتر اوْلاراق تانیملاماق اوْلماز؛ چۆن بارماق قوْیدوغو موضوع، گۆنوموزون ایجتیماعی واقعیتلری‌نین آیناسیدیر، کی تۆرک دیلینده تبریزین گؤبگینده روایت اوْلونور.
بو تئاتر، موخاطب اۆچون، گۆنوموزده جامیعه‌نین سس‌سیزلیگینده، سؤیلنمه‌میش بیر حیکایه‌نی یاشاماقدا اوْلان قادینلارین بلالی و تانینمامیش دۆنیاسی ایله تانیش اوْلماغا دَیرلی بیر فۆرصت ساییلیر.
بو اثرین تاماشاسی تئاتر، کیملیک و اینسانی دغدغه‌لرله ماراقلانانلار اۆچون عاطیفی، ایجتیماعی و اونودولماز بیر تجروبه ساییلا بیلر.
هر آخشام ساعات ۲۰
تبریز ۲۹ بهمن فرهنگی هۆنری مجتمعی، مقبلی پلاتوسو
انتهای پیام/